Ұстаз жолы – мәңгілік шырақ Тундебаева Бахыт Зекенқызы 1968 жылдың 10 ақпанында қазақтың кең даласы, тарихтың толқынына куәгер болған Семей облысының Ақсуат ауданына қарасты Көкжыра ауылында дүниеге келді. Сол ауылдың топырағында нәр алып, ауыл мектебінің табалдырығын аттаған Бахыт Зекенқызы бала күнінде-ақ білімге деген құштарлығын танытты. Көкжыра ауылындағы Мұхтар Әуезов атындағы орта мектептің 8-сыныбын үздік бітіріп, оқу жолында ары қарай шыңдалуды мақсат етті. Білімге деген құштарлық оны арманға жетелеп, Семей қаласындағы құрылыс техникумына жол бастады. Кейін 2007 жылы Семей педагогикалық колледжін үздік тәмамдап, КазГИЮУ университетінде білімін сырттай жалғастырды. Әкесі Уалиев Зекен ауылда пошта бөлімінің бастығы қызметін атқарған, бірақ тағдырдың жазуы бойынша ерте өмірден озды. Бахыт Зекенқызы үшін асыл анасы Дакеннің бейнесі мәңгілікке жадына сақталды – қарапайым еңбекпен сегіз баланы өсіріп, әрқайсысына өмірлік жол сілтей білді. Өз қатарластары арасында үздік атанған, бірақ қарапайым отбасынан шыққан Бахыт Зекенқызының мұғалім болсам деген арманы осы кезде жарқырай түсті. 2007 жылы Бахыт Зекенқызының еңбек жолы «Көктал орта мектеп-бақшасы» коммуналдық мекемесінде басталды. Қызмет сатысымен өрлеу жолы оңай болған жоқ, ол хатшы да болды, тәлімгер де атанды. Қарапайым еңбектің, табанды ізденістің арқасында директордың тәрбие ісі жөніндегі орынбасары қызметіне қол жеткізіп, бүгінде директордың оқу ісі жөніндегі орынбасары ретінде 7 жылдан бері шәкірт тәрбиесіне күш жұмсап келеді. Ұстаздық – жауапкершілігі мол, асқақ жол. Бахыт Зекенқызының айтуынша, бұл сала қызығы мен қиындығы қатар жүретін кәсіп. Ұстаз үшін әр баланың әрбір жетістігі – ерекше қуаныш. Жауапкершілігі биік, мейірімі мол жан ретінде ол әр шәкіртінің білімге деген талпынысына демеу болуды өзіне парыз деп санайды. Атақты Ахмет Байтұрсынов айтқандай, білім – біліктілікке жеткізер баспалдақ болса, біліктілік сол білімді іске асыру дағдысынан көрінеді. Ендеше, Тундебаева Бахыт Зекенқызы сияқты ұстаздарымыздың еңбегі өскелең ұрпақ үшін үлкен өнеге, мәңгілік шырақ болып қала бермек.