Махсутова Рауза Усербайқызы – өмір жолында талай қиындықтарды еңсеріп, еңбекқорлық пен адамгершіліктің биік шыңына жеткен жан. 1968 жылдың 14 қарашасында Атырау облысы, Атырау қаласында дүние есігін ашқан, кіші жүздің Адай руынан шыққан Рауза Усербайқызының тағдыры бала кезден-ақ ізгілік пен адалдық жолында өрбіген. Әке мен ананың мейірімі, олардың берген тәрбиесі – келешектегі тұлға болуына берік іргетас болды. Рауза Усербайқызы отбасындағы бес баланың екіншісі. Әкесі Махсотов Усербай – адалдық пен еңбекқорлықтың шынайы үлгісін көрсеткен. Әке махаббатының шуағында өсіп, оның кеңесші, ақылгөй болмысынан шабыт алған Рауза Усербайқызы үшін әке бейнесі өмірінің ең асыл құндылықтарының бірі болып қала берді. Әкесі 1936 жылдың 1 қаңтарында дүниеге келіп, ұзақ жылдар адал еңбек еткен, ал 2021 жылы өмірден озды. Анасы Кудасова Нұржамал 1937 жылы дүниеге келіп, өмірінің елеулі бөлігін балаларына арнады. Өкінішке орай, тағдырдың тәлкегімен 1980 жылы ауыр дерттен өмірден өтті. Анасының тәрбиесі мен мейірімі балаларының жүрегінде мәңгі сақталып, оның үлгілі болмысы Рауза Усербайқызының өмірлік бағыт-бағдарына айналды. «Ана бір қолымен бесік тербесе, бір қолымен әлемді тербейді» деген дана сөздің мән-мағынасын әрдайым жадында сақтап, аналық махаббат пен қамқорлықтың қасиетін терең түсінді. Ананың берген тәрбиесі мен өмір сүру салты Рауза Усербайқызы үшін өмірдің әр сәтінде үлкен демеу болды. Мектеп жылдары да өзгеше өрбіді. 1984 жылы Ыбырай Алтынсарин атындағы орта мектепті үздік аяқтап, қызыл аттестат алды. Бұл жетістік оның білімге деген құштарлығының белгісі еді. Сол жылы Гурьев медициналық училищесіне түсіп, болашақ медбике ретінде мамандық таңдады. Училищені 1987 жылы бітіріп, қолына медбике дипломын алған Рауза Усербайқызының алдында үлкен жол ашылды. Атырау облыстық Денсаулық сақтау басқармасының жолдамасымен балалар емханасына жұмысқа қабылданып, медициналық саладағы алғашқы қадамдарын бастады. Медбикенің жұмысы өте маңызды әрі жауапты. Науқасқа дер кезінде көмек көрсетіп, оның жағдайын жақсартуға септігін тигізу – әр мейірбикенің міндеті. Бұл мамандық тек біліктілікті ғана емес, мейірімді жүрек пен науқастарға шынайы жанашырлықты талап етеді. Рауза Усербайқызының адал қызметі, өз ісіне деген махаббаты оны талай жетістіктерге жетеледі. Ол үшін медицина – тек кәсіби қызмет емес, өмірінің мәні. Әр науқасқа жанашырлық танытып, кәсіби шеберлігін шыңдап, мейірбикелік ісін шынайы махаббатпен атқарып келеді. 2007 жылы жаңа жұмыс орнында қызмет ету мүмкіндігі туды. В.И. Ленин (қазіргі Мағжан Жұмабаев) атындағы мектепке медбике ретінде ауысты. Мектеп медбикесінің қызметі күрделі болғанымен, жауапкершілікпен қарай отырып, білім мен денсаулықтың үйлесімділігін сақтауда зор үлес қосты. Қазіргі уақытта №39 орта мектепте медбике қызметін атқарып, жоғары дәрежелі мейірбике атағына ие. Жоғары білімді, тәжірибелі маман ретінде әрбір оқушының денсаулығын қадағалауда үлкен үлес қосып келеді. Отбасы өмірінің ерекше мәні бар. 2002 жылы Есмағанбетов Орынбек Қаденұлымен отбасын құрды. Екеуі бір ұл мен бір қызды тәрбиелеп өсіріп келеді. Отбасы – Рауза Усербайқызы үшін Отанның кішкентай бір бөлшегі, рухани байлықтың қайнар көзі. Жанұя мүшелеріне деген сүйіспеншілігі оның өмірлік ұстанымдарының негізгі арқауы болып табылады. Әрбір отбасы мүшесінің амандығы мен бақыты – оның басты мақсаттарының бірі. Мамандық жолында үздіксіз ізденіс пен білімге ұмтылу маңызды. Заман талабына сай орта буын медицина қызметкерлерінің де деңгейі жоғарылауда. Заманауи медбике тек білікті маман болып қана қоймай, терең білім мен іскерлікке де ие болуы қажет. Осы талаптарға сай болу үшін Рауза Усербайқызы өз білімін әрдайым жетілдіріп, жаңа ақпараттармен танысуды басты міндеті санайды. Рауза Усербайқызы үшін ең үлкен үлгі болған тұлғалар – ата-анасы. Әке-шешесінің берген тәрбиесі, өмірге деген көзқарасы мен үлгі-өнегесі оның бойына сіңген. Әсіресе әкесінің адалдыққа толы өмір жолы, еңбекқорлығы мен мейірімділігі Рауза Усербайқызын әрдайым шабыттандырып келеді. Сонымен қатар еңбек жолындағы алғашқы әріптестері, тәжірибелі мамандар да оның дамуына үлкен ықпал етті. Әрбір кездескен жан оны тек кәсіби тұрғыдан ғана емес, адами қасиеттерімен де байытып отырды. Ерекше жауапкершілікті талап ететін мамандықты таңдап, өмірін медицинаға арнаған Рауза Усербайқызы жас мамандарға: «Ең бастысы – білім мен еңбек» деп кеңес береді. Жастарға медицина саласында үздік болу үшін тынымсыз еңбектеніп, білімді жетілдірудің маңызды екенін ескертеді. Медицина қызметкерлерінің еңбегі ең жауапты және күрделі болғандықтан, олардың әрдайым өз денсаулығына да мән беруі қажеттігін атап өтеді. Рауза Усербайқызының өмір жолы – жауапкершілік, адалдық пен жанашырлықтың айқын үлгісі. Тек медицина саласында ғана емес, отбасы, қоғам алдындағы міндеттерді адал орындау – оның басты ұстанымы. Осындай жанкештілік пен табандылық арқасында ол өз орнын тауып, айналасындағыларға үлгі бола білді.