Ләззат Біләлқызы Қожақова – өнерге ғашық, шәкірт тәрбиелеу жолында талмай еңбек етіп келе жатқан шебер. Сыр елі – Қызылордада дүниеге келген. Әкесі – қолынан өнер тамған, бала кезден шығармашылыққа баулыған нағыз шебер, өнертапқыш жан, ал анасы – даналықты серік еткен, әр сөзін өсиет қып айтатын парасатты адам. Осы екі тұлғаның ықпалымен Ләззат Біләлқызы еңбек пен ізденісті серік етіп, өнер жолына түсті. Оқытушы болу алғашында ойында болмаған. Алайда, шығармашылыққа деген табандылығы жолын ашып, Қазақ анимациялық кино мектебінің негізін қалаушылар Амен Әбжанұлы Хайдаров, Ерсайын Абдрахманұлы және Ғимұрат Егінбайұлы Бекішев сынды ұстаздары сенім артып, Т.Жүргенов атындағы театр және кино институтын тәмамдаған соң, білім беру саласында ұстаздық етуге шақырды. Осылайша, өнер саласындағы шәкірт тәрбиесіне кірісіп, талай жастың шығармашылық жолына бағыт көрсетті. Қызметте жетістікке жету жолында ата-анасының қолдауы мен тәлімінің ықпалы ерекше болды. Олар әрдайым білім мен еңбектің адамды кез келген асуға жетелейтінін санасына сіңіріп, өз ісінің шебері болуға үйретті. Жан дүниесінде көркемдікке құштарлық, білімге деген құмарлық секілді қасиеттер орнығып, өмір жолын өзі қалап алған өнер саласында жемісті еңбек етуге ықпал етті. Шығармашылық жолдың қиындықтары да аз болған жоқ. Сынақтарға қарамастан, әрбір қадамнан шабыт тауып, осы саланың терең әлеміне бойлады. Өнерді таза жүрекпен сезінуді, адами қасиеттерді жоғалтпай, өрісін кеңейтуге баса назар аударды. Өмірлік ұстанымдары оны әркез алға жетелеп келеді. Сабырлы болуды, ешкімге ренжімеуді, берген уәдеге берік болуды өзіне қағида ретінде қабылдады. Әр істі байыппен атқаруды және жемісін көруді дұрыс санайды. Өмірінде есте қалған қызықты сәттер де жеткілікті. Әр күнді көтеріңкі көңілмен қарсы алып, оны ерекше естелікке айналдырып, алға жылжуды басты мақсат етеді. Әрбір сәттің өз құндылығын бағалап, оң көңіл-күймен өмір сүргенді құп көреді. Үлгі тұтар тұлғалары ретінде ата-анасын қадірлейді. Әке мен ана – өмірдің ақ-қарасын ақылмен бағалап, даналықпен, байсалдылықпен алға қадам басқан жандар. Ал өнер әлемінде өзіне үлгі ретінде атақты америкалық суретші-мультипликатор, режиссер Уолт Диснейді санайды. Анимация саласында әлемге танылып, келешек ұрпақ тәрбиесіне зор үлес қосқан Дисней тұлғасын жоғары бағалайды. Отбасында жұбайы екеуі балаларынан қуаныш табады. Ұлдары мен келіндері, немерелері мен жалғыз қыздары өз жолын тауып, жеке өмірлерінде бақытқа бөленіп жүр. Өмірлік серігімен бірге ұрпағының игілігі үшін тілеулес болып отыр. Алға қойған мақсаттары мен жоспарлары да саналуан. Әрқашан ойды таза ұстап, шығармашылық жолында тың жаңалықтардың жаршысы болуды армандайды. Өнер мен білім жолында әлі де жаңалықтар жасап, халық игілігіне еңбек етуді өзіне парыз санайды.