Алтынкүл Дүйсеғалиқызы – ұрпаққа үлгі, еңбекқор, өмірдің әр саласында саналы қызмет етіп жүрген қайраткер тұлға. Маңғышлақ облысы, Ералиев ауданының Жетібай ауылында 1963 жылдың алтын күзінде дүниеге келіп, туған топырағында бастауыш, орта білім алғаннан кейін, арманын жүзеге асыру мақсатында Қарағанды мемлекеттік медицина институтына оқуға түсті. Осында алған білімі мен ұмтылысы арқасында гигиена, санитария, эпидемиология маманы ретінде дәрігерлік жолға қадам басып, халықтың салауаттылығын арттыру жолында үлкен еңбек сіңірді. Алтынкүл апайдың ата-анасы – Жұмағалиев Дүйсеғали мен Ақтөреева Қаным да қарапайым еңбек адамдары болған. Ата-анасының қарапайым, бірақ қажырлы еңбегі балаларының жадында қалды, тек үлгі болып қана қоймай, еңбекке адал, білімді болуды аманат етті. Осы жолды жалғастырған Алтынкүл апай да әріптестеріне, қызметтестеріне үлгі болып, білімін шыңдап, адамгершілік пен жауапкершілікті алға қоя білді. Алғашқы еңбек жолын Көкшетау облысы, Қызылту ауданының санитарлық-эпидемиологиялық станциясында бастады. Әр қадамын жауапкершілікпен атқарып, Алтынкүл Дүйсеғалиқызы еңбектің абыройын арттырып, бірнеше жауапты қызметтерді атқарып келеді. 2015 жылдан бастап қазіргі уақытқа дейін «Ұлттық сараптама орталығында» қызмет атқарып келеді. Еңбектің еленуі де бар, білімі мен білігі халыққа қызмет етуде лайықты бағасын алып, Денсаулық сақтау министрлігінің марапатына ие болды. Еңбектегі әр жетістігі үлкен күш-жігер, төзімділік пен табандылықтың көрінісі іспеттес. Өмір жолында талай қызықтар мен қиындықтарға куә болған жан. Жақындары мен балаларына, ата-анасының аманатына адал болып, ұрпақтарын елдің азаматы етіп өсірді. Өмірлік мақсаттар мен ұстанымдар оның өмірінде маңызды орын алады. Адалдықты, шүкіршілік пен қанағатты әрқашан серік етіп, ұрпағына да осы құндылықтарды дарытуды мақсат тұтады. Алтынкүл апай үшін балалары – Алмас пен Әлия – мақтанышы, тірегі. Балаларын жақсы тәрбиелеп, оларға білім беріп, екеуін де жоғары оқу орындарында оқытты. Ана жүрегінде ұрпағының бақыты, балаларының амандығы мен болашағы әрдайым бірінші орында. Қазіргі күні қызының өз отбасын құрып, немерелерінің өсіп-өнгенін көріп, ұрпағымен бірге болуды үлкен бақыт санайды. Бүгінде анасына қамқор болып, әулетінің тірегі, абыройлы ана, адал еңбеккер, сүйікті апа болуды жалғастырып келеді. Келешекте балалары мен немерелеріне үлгі боларлық істерімен алға қойған мақсаттарын жүзеге асырып, халыққа пайдалы қызметін жалғастыруды армандайды. Алтынкүл Дүйсеғалиқызының өмір жолы – өрісті ұрпақ, еңбекпен келген абырой мен сыйластықтың көрінісі.