Жангабаева Камшат Ниетбаевна

Антына адал дәрігер

Денсаулық – кез келген адам үшін баға жетпес байлық. Адам өмірін ұзартуға септігін тигізіп, ажалдан арашалаушы дәрігерлерге халқымыз ежелден құрметпен қараған.  Адам жанының арашашысы аталатын ақ халаттылардың еңбегі қашан да зор. Кәсібіне адал, білікті дәрігер әрдайым халықтың ыстық ықыласына бөленеді. Халықтың алғысын алып жүрген сондай білікті дәрігердің бірі –  Жангабаева Камшат Ниетбайқызы.
Камшат Ниетбайқызы 1983 жылы 14 қазанда Өзбекстан республикасы Кегейлі ауданында дүниеге келген. Әкесі Жангабаев Ниетбай 1945 жылы туған, Қарақалпақстанға қызметі сіңген юрист, майор. Қарақалпақстан Республикасы прокуратурасы саласында 40 жыл қызмет атқарған ол 2004 жылы жол апатынан қайтыс болған. Анасы Жұмабаева Дәме Қазиқызы 1945 жылы туған. Мамандығы агроном. Қарақалпақстан Республикасы тұқым шаруашылығы жөніндегі мемлекеттік инспекцияның меңгерушісі қызметін атқарған. 1990 жылы дүниеден озған.
Камшат Ниетбайқызы бала кезден дәрігер болуды армандайды. 1999 жылы көздеген мақсатына жету үшін Ташкент педиатрия медицина институтының «Емдеу ісі» бөліміне оқуға түсті. Жоғары оқу орнын бітірген соң еңбек жолын Өзбекстан Республикасы Нөкіс ауданында перзентхана бөлімінде акушер гинеколог дәрігері болып бастаған. Бүгінде 18жыл еңбек өтілі бар, жоғары санатты дәрігер.
2012 жылы тарихи отаны –Қазақстанға қоныс аударып, Алматы облысы, Ақсу ауданы орталық ауруханасы перзентхана бөліміне жұмысқа орналасып, ауданның қыз- келіншектерініңденсаулығын сақтауға ат салысып, көптеген нәрестелердің дүние есігін ашуына өз септігін тигізді. 2016 жылдан 2024 жылға дейін Алматы облысы Іле ауданы орталық ауруханасының перзентхана бөлімінде қызмет атқарды. Қазіргі күнде Жетісу облысы Ақсу ауданы орталық аруханасында қызмет атқарып келеді.
Ізденімпаз маман өзі қалаған дәрігерлік мамандығының қыр-сырын терең меңгеру үшін біліктілігін арттыру курстарына қатысып, тәжірибе алмасудан жалыққан емес. Осы мақсатта ол Ресей мемлекетінде болып тәжірибесін шыңдады.
«Ана мен бала денсаулығын сақтау өте жауапты іс. Науқасы хәл үстінде болған кездерде үй бетін көрмей аурумен алыстым. Өз басымды қатерге тіксем де, антыма адалдық танытып келе жатырмын. Күн-түн демей, еш санаспай, мылтықсыз майданда әрбір жүкті әйелдің жанын аман алып қалу үшін айқасып келемін. Мамандығымның қиындығымен қатар, қызықшылығы, қуанышы, бақытты сәттері де көп. Мысалы тоғыз ай, он күн күткен сәбиін анасының қолына аман-есен ұстатқан кезімізде бар қиындық артта қалып, өзімізді ажал арашасы екенімізді сезініп, жанкешті еңбегіміздің жемісін, нәтижесін сезінетін сәттер болады» дейді Камшат Ниетбайқызы.
Камшат Ниетбайқызының өмірлік ұстанымы – өзіңді және өзгені құрметтеу, әр жасаған іс-әрекетке жауап бере білу.
Ол «әрбір дәрігердің өмірінен кинофильм түсіруге болады» дейді. Өйткені қиындығы мен қуанышы, қызығы мен шыжығы қатар жүретін бұл мамандықтың әр бір күні кейде көңілді кейде мұңлы оқиғаларға толы.
Осы орайда өзі куә болған мына бір оқиғаны айтып берді.
«Есіме дәл қазір күрделі бір оқиға түсіп отырғаны. 2014 жылы осы Ақсу ауданы Жансүгіров ауылында жұмыс істеп жүрген кезімде жүкті әйелді шұғыл түрде жедел жәрдем көлігімен облыс орталығына тасымалдау керек болып, жолға щықтық. Күннің батып келе жатқан кезі еді. Қатты жылдамдықпен келе жатқан көлігіміздің алдына қатты екпінмен жылқы келіп соғылып жол апатына түстік. Есімді жидым да науқасқа қарай жүгірдім, қан қысымын өлшеп, баласының жүрек соғысын тыңдадым, аман екен. Ақ халатыммен жолдың ортасында тұрып өтіп бара жатқан көліктердің бірін тоқтатып облыс орталығына жеткізуін өтіндім. Аман- есен жүкті әйелді облыс орталығына жеткіздік, алты қыздан кейін көптен күткен ұлы екен, аман-есен босанды. Біздің жұмысымызда осындай қиын да қызықты оқғалар болып тұрады» дейді дәрігер.
«Жақсы әкенің даналығы балаға мың жылдық азық» демекші, Камшат Ниетбайқызының өмірдегі еліктейтін, үлгі тұтар адамы – марқұм әкесі.
«Әкем сегіз қырлы,бір сырлы,өз мамандығын жақсы менгерген,өнерге жақындығы бар, қызылтілді кісі болатын. Өз бойыма әкемде бар қасиеттерді сіңіруге тырысып келемін. Кез келген кішкентай бастамаларымды үлкен жетістікке балап, қолдап-қолпаштап отыратын. Қазіргі өмірімде Әкемнің маған деген сенімінің үлесі зор» дейді ол.
Камшат Ниетбайқызы дәрігер ғана емес, сонымен бірге ол – сүйікті жар, ардақты ана, бір шаңырақтың қадірлі отанасы. Оның отбасын дәрігерлер отбасы деп атауға болады.Себебі өмірлік жолдасы Кунирбаев Қайрат Рабайұлы да медицина саласында қызмет етеді. 4 бала өсіріп, тәрбиелеп отырған бақытты отбасы.
Камшат Ниетбайқызының алға қойған мақсаттары мен жоспарлары көп. Соның бастысы – Жетісу облысы денсаулық сақтау саласының дамуына өз үлесін қосу. «Әр бір босануға келген әйелдің нәрестесін аман-есен бауырына басуына көмегім тисе меннен асқан бақытты жан жоқ» дейді антына адал дәрігер.