Рахат Әділқызы

«Медицина кәсібі – адамгершіліктің асылы»

          Ақ халатты жандардың сенімді серігіне айналған медбикелердің жұмысы қашанда үлкен жауапкершілікті қажет етеді. Дәрігер емінің нәтиже беруі де ең алдымен медбикенің ұқыптылығына байланысты. Осы салада көптеген жыл қызмет еткен Қожамжарова Рахат Әділқызы алдына келген науқастан көмегін аяған емес.
 Ол 1966 жылы 24 қарашада Ташкент облысы, Ташкент ауданы, Сәрке ауылында дүниеге келді. 1973 жылы №29 Э.Тельман атындағы орта мектепке барып, 1984 жылы мектепті үздік тәмамдайды. 1985жылы Ташкент қаласындағы САМПИ мед училищесіне түсіп,1987 жылы Емдеу профилактика мекемелеріндегі балалар мейірбикесі мамандығын алып шықты.
           Еңбек жолын 1987 жылы Ташкент қаласындағы САМПИ клиникасында мейірбике қызметінен бастайды. Осы жылдан 1992 жылға дейін аталған клиниканың 1-ші хирургия бөлімшесінде мейірбике қызметін атқарады.
            Атамекенге оралғаннан кейін кәсіби біліктігін көрсетіп, қызметін әрі қарай жалғастырады. 2002-2012 жылдар аралығында Сарыағаш ауданы Жібек жолы ауылдық емханасында аға мейірбике қызметіне тағайындалады. Өзінің мамандығына сүйіспеншілікпен қарап, халық денсаулығын жақсартуда аянбай еңбек етеді. Бұл жұмыстағы жауапкершілігі басшылар тарапынан қолдау тауып, лайықты марапатталады. Атап айтар болсақ, Сарыағаш аудандық Денсаулық сақтау бөлімі, Жібек жолы ауылдық емханасының кәсіп одақ комитеті, және Сарыағаш аудандық Медицина бірлестігі бастығы , Сарыағаш аудандық медицина қызметкерлері кәсіп одақ комитеті қоғамдық бірлестігінің кеңес төрағасы, сонымен қатар Жібек  Жолы ауылдық огругінің әкімінен бірнеше рет Мақтау қағаздары мен Алғыс хаттарымен марапатталды.
            Жалпы медицина қызметкерлері ұдайы ізденісте жүріп, білімін жетілдіріп, тәжірибе алмасып тұрады. Бұл олардың жұмысына деген жауапкершіліктің екі есе екенін аңғартады. Рахат Әділқызы 2010 жылы 21 шілде айында «Мейіргер ісі» бойынша жоғары біліктілік санатын алады.
Әрбір жанның өзінің қызмет жолында өрлеу дәуірі болады. Міне, медицина маманы Рахат Қожамжарованың да жұмысындағы жұлдызының жарқыраған сәті осы кезең болса керек-ті.
–    Осы 2002-2012 жылдар аралығында мен өзімді ізденгіш, қабілетті, білімді және жұмысыма жауапкершілікпен қарай алатын қызметкер ретінде көрсете білдім. Қоғамдық жұмыстарға белсене қатысып, санитарлық ағарту жұмыстарында әрқашан алда жүріп,халық денсаулығын нығайтуда үлкен жетістіктерге жеттім, – дейді ақ халатты абзал жан.
2012 жылы тамыз айында Шымкент қалалық Жұқпалы аурулар ауруханасының қабылдау бөліміне мейірбике қызметіне қабылданады. 2012 жылы қыркүйек айында 4-ші бөлімшеге аға мейірбике қызметіне ауыстырылды. 2020 жылы қыркүйек айында 7-ші бөлімшеге аға мейірбике қызметіне ауысып, қазіргі таңда осы бөлімшеде аға мейірбике қызметін абыроймен атқарып жалғастырып келеді.
–Былай қарағанда медбике қызметі кей адамдарға аса қиын жұмыс тәрізді көрінбеуі мүмкін. Бірақ медбике науқастың денсаулығына дәрігерден кем жауап бермейді. Тамыр мен бұлшық етті дәл тауып, науқастың денесін жарақаттамай ине салудың өзіне үлкен ептілік керек. Өзім осы салада жүріп талай адамның алғысына бөлендім. Аллаға шүкір, еш өкінішім жоқ, – дейді жүзінен мейірім ескен мебдике.
Науқастың қасы мен қабағына қарап, ауруынан айығып кеткенше бәйек болып жүретін медбикенің еңбегін әріптестері де жоғары бағалады. Оның ынта-жігеріне риза болған тәжірибелі дәрігерлер ақыл-кеңесін аямады. Маманның кәсіби біліктілігін анықтайтын сынақтарда Рахат Әділқызы үздік атанып жүрді.
          2017 жылы маусым айында Шымкент қалалық жұқпалы аурулар ауруханасының бас дәрігерінен Медицина қызметкерлері күні кәсіби мерекесіне орай Алғыс хатпен марапатталды. 2018 жылы қыркүйек айында Шымкент қаласы ішкі саясат бөлімінің, Шымкент шырайлы қала атты Шымкент қаласының медицина қызметкерлерінің қатысуымен өткен іс-шараға белсенді қатысқаны үшін «Жас кәсіпкерлерді қолдау одағы» куәлік табыстады.  2022 жылы мамыр айында «AQNIET»Қазақыстандық денсаулық сақтау қызметкерерінің салылық кәсіп одағы, Шымкент қаласы және Түркістан облысы филиалының төрайымы атынан Құрмет громатасымен марапатталды.
               Иә, адам өмірі үшін жауап беру өте қиын. Әрі осы салада ұзақ жұмыс істеу де табандылықты қажет етеді. Дәрігердің бірінші көмекшісі мейіргерлердің да қызметі ылғыи қауырт. Өз өмірінен өзгенің өмірін бірінші орынға қоятын абзал жандар десе де артық айтқандық емес. Науқастың жанын ұғынып, оған алғаш көмек көрсететін де мейіргерлер. Сондықтан біліктілігін арттыру мақсатында бірнеше оқулар оқып, ізденуден жалықпайды. Мәселен, 2013 жылы Сайрам колледжі жеке мекемесінде «АИТВ\ЖИТСалдын алудағы мейірбикесінің рөлі» атты семинарға қатысып оқып куәлік алды. 2017 жылы ақпан айында Оңтүстік Қазақыстан мемлекеттік фармацевтика академиясы «Симуляцциялық технологиялар бойынша тәжрибелік дағдыларды жетілдіру» бойынша үйретуші семинарға қатысып куәлік иеленді.
            2018 жылы сәуір айында Халықаралық Қазақ-Түрік университетінде «Қырым қанды безгегін жұқтырған науқастармен жұмыс істеу» тақырыбы бойынша білімін жетілдірді.
           2018 жылы сәуір- қыркүйек айларында орыс тілін қарапайым «А1» деңгейде оқыту бағдарламасы бойынша курс оқуын бітіріп куәлік алды.
2018 жылы қыркүйек айында Ұлттық кардиохирургия орталығында «Пациент ориентированность-новая модель сестринского ухода» атты конференцияға қатысып, куәлік алды.
           2019 жылы сәуір айында «Esai Gvand» дипломнан кейінгі мамандарды қайта даярлау және біліктілікті арттыру орталығында «Жалпы мейірбикелік технологиялар циклнан» Мейірбике ісі мамандығын оқып куәлік алды.
           2020 жылы қыркүйек айында дәрігерлерді дипломнан кейінгі оқыту аймақтық институтында Мейіргер ісі мамандығы бойынша дәрігерге дейінгі кезектегі шұғыл медициналық көмек көрсету алгоритимі (BLS,PHTLS) біліктілігін арттырып куәлік иеленді.
         2022 жылы «Мейір-Бейс» жоғары колледжіне түсіп, 2024 жылы осы аталған колледждің мейіргер ісі кәсібі мамандығы бойынша күндізгі оқу білімін бітіріп, диплом меленеді. Міне, өз ісін жақсы көретін жанның үнемі ізденіп, талмай оқып, білім алуда ешқандай уақыттың кеш емес екенін Рахат Әділқызының өміржолынан көре аламыз.
Медбикенің жұмысына ең қажет нәрсе – өз ісіне берілгендік және науқастарға жауапкершілікпен қарау. Жалпы, мейірбике науқасқа ең жақын әрі қамқоршы адам. Сол себепті медбикенің өз мамандығына деген сүйіспеншілігі, алдына келген науқасқа жанашырлық танытуы бәрінен маңызды. Бүгінде заман ағымына сай орта буын медицина қызметкерлеріне қойылатын талап деңгейі де жоғарылады. Қазіргі заманауи медбике жоғары білікті, терең білімді болуы қажет. Мейірбикенің әр күні науқастардың жағдайын жасап, бәйек болумен өтеді. Міне, осы жолда аянбай еңбек етіп келе жатқан жанның кейінгі жастарға көрсетер үлгі-өнегесі мол. Ол ең алдымен мамандыққа деген адалдығы мен жауапкершілік жүгінің екі есе екенін тілге тиеі етті.
–   Әрбір адамның еңбек жолында өзінің ұстанымы, көзқарасы, пайымы, алға қойған мақсаты болады. Менің негізігі ұстанымым – жұмысқа деген жауапкершікті арттыру. Бұл дегеніміз жұмысқа өз уақытында кешікпей келу, дәрігердің тапсырған нұсқауларын дер кезінде орындауларын қадағалау. Ал мақсатыма келер болсақ,  мед.училищесінде алған білімімді адал еңбегіммен ұштастыра отырып, бакалавр дәрежесін меңгеріп, менторлық сабағын жастарға үйретіп, өз үлесімді қосу. Осы жолда абыроймен қызмет етіп келе жатқаным – өз салама деген сүйіспеншілігім мен қажымас еңбегімнің арқасында мақсатымның орындалғаны деп білемін, – дейді тәжірибелі маман.
Осыншама уақыт медицина саласының дамуына өзінің адал еңбегімен абыройлы атқарып келе жатқан ол өз жұмысына аса жауапкершілікпен қарайды. Ол үшін алдымен науқастың көңіл-күйі маңызды. Дәрігердің нұсқауы бойынша науқасқа ем жасайтын маман уақытпен санаспай, жүрек қалауымен таңдаған кәсібін ұзақ жылдардан бері атқарып келеді.
– Қызығы мен қиындығы мол бұл мамандық өзіме ұнайды, талай жақсы адамдармен әріптес атанып, жұмыс істедім. Бұл салада кез келген адам жұмыс істей алмайды. Ең бастысы, өз ісіңді жақсы көріп қана қоймай, төзімді болуың да керек. Еңбек жолымда әртүрлі қызықты да қиын жағдайлар кездесті. Қызметте жүрген әр минут, әр сағат, әр күн мен үшін өте сәтті өтуде десем, артық айтқаным емес, – дейді Рахат Қожамжарова.
Қызметінде жемісті еңбек етіп, адамгершілігі мол маман болып қалыптасқан майталман маман отбасылық өмірінде 4 перзент сүйіп, олардың әрбірінің өмірден өз орнын табуға бағыттап келеді. Қыздарының үлкені Гүлжан – ақылына көркі сай. Бүгінде анасының ақылшысына айналған. Ал ортаншы қыз Балжан мен кенже қызы Фатима да анасына қолғанат. Үш қызғалдақтан кейін өмірге келген Жарылқасын әрдайым анасына қолдау көрсетеді. Балаларының барлығы жоғары білімді маман. Әрқайсысы еліміздің дамуына үлес қосып жүрген білікті маман иелері. Жауапты қызметте жүрсе де осындай саналы, салиқалы ұрпақ өсіріп, тағылымды тәрбие берді. Қоғамның бір-бір кірпіші болып қалануына аналық батасын беруден аянған емес. Міне, балаларына деген ыстық ықыласы мен аналық ризашылығының арқасында олар да биіктерді бағындыруда. Перзенттерінің барлығымен мақтануға болады.
 «Жақсының жақсылығын айт, нұры тасысын» деген сөз бар. Бүгінде ақ халатты абзал жан науқастардың сауығып кетуі үшін аянбай қызмет жасап, жаңадан келген жас мамандарға бар білгенін үйретуден жалыққан емес. Ұжымда әріптестеріне сыйлы, үлкендерге ізетті, кішілерге құрметті маман иесі.
«Медицина кәсібі – адамгершіліктің асылы» деп бекер айтылмаса керек. Біз де жүрегі жомарт, көңілі дария, науқастарға сөзімен де, ісімен де шипа бола білген мейірбан жүректі медбике Рахат Әділқызының алдағы уақытта да абыройы асқақтап, мерейі үстем болуына тілектеспіз!