Мақсат Мақұлбеков

Ән әлемінің серісі – Мақсат

Өнер жолы басқаларға өзіңді үнемі дәлелдеуді талап етеді. Бұл мамандықта артқа қарай шегіну жоқ. Бәйгеге қосқан жүйрік аттай үнемі қамшыланып тұруың керек. Бір уақытта өзіңді босатып жіберсең, көштен қалдың деген сөз. Ал осы көштің ең басында жүруді мақсат еткен Мақсат Мақұлбековтің өнердегі жетістігі аз емес. Асылы, ән салу оған ана сүтімен дарыған болу керек-ті. «Балам, мен жетпеген шыңға сен шық, әншілікті енді өзің кәсіби тұрғыда жалғастыр» деп өнер жолындағы қадамына анасы ақ батасын береді.
        2005 жылы Қазанғап атындағы музыкалық колледжінің «Ән салу» бөліміне оқуға түсіп, ҚР еңбек сіңірген әртісі Қаракөз Ақдәулетованың сыныбына түсу бақыты бұйырады. Студент кезінде 2007 жылы Астана қаласында өткен «Шабыт» фестивалінде «Үміт» сыйлығының иегері болады,2007 Қызылорда қаласында өткен ХХVIII Республикалық вокалистер конкурсында 1орын алып лауреат атанып  үлгереді. 2009 жылы колледжді жақсы бітіріп, сол жылы музыка өнерінің қара шаңырағы Құрманғазы атындағы Қазақ ұлттық консерваториясына оқуға қабылданады. Ол белгілі ұстаз  Қазақстанның халық әртісі, профессор Ғафиз Есімовтің сыныбында білімін шыңдайды. Консерватория қабырғасында жүріп халықаралық, республикалық вокалистер конкурсының лауреаты атанып, проректор, композиторлар одағының мүшесі А.Райымқұлованың жетекшілігімен «Аңсар» вокалды тобын құруға себепкер болып, оның құрамында әнші болып қызмет етті. Топпен бірге көптеген елдерде қазақ елінің өнерін насихаттап, таныстыруға үлес қосады. 2012 жылы Астана қаласында өткен Шабыт фестиваліне қатысып IІІ орын, 2012 жылы VI Халықаралық Бибігүл Төлегенова атындағы вокалистер конкурсының ІІ орын иегері атанады. Ал 2015 жылы Медеу Арынбаевтың тәлімгерлігімен «Қазақстан дауысы» жобасының финалында үздік өнер көрсеткенін көзі қарақты көрермен әлі ұмыта қоймаған болар. Мақсат Нұрланұлы Консерваторияда өз білімін шыңдай жүріп, Абай атындағы  қазақ мемлекеттік академиялық опера және балет театрына қызметке қабылданады. Оның театрдағы қадамы ең төменгі сатыдан басталды. Қазіргідей дәрежеге жетуінің сыры да осында. Киелі сахнаның әр баспалдағында талай жыл төккен тері бар. Солистік деңгейге дейін көтерілу жолында өз-өзін қамшылап,  ерік-жігерінің мұқалмауынан деп білу керек. Әнші болудың не қиындығы бар деп ойлайтындар да кездеседі. Алайда ән әлемінің ең биік шыңына жету үшін нар тәуекелге баруға тура келетін уақыттар болатынын қарапайым көрермен біле бермеуі мүмкін. Мақсат Нұрланұлының киелі өнердегі батыл қадамға баруы, оның бойындағы асыл қасиеттердің бірі деуге боларлық. Бірде ұстазы Ғафиз Есімов; «Мақсат, сен Е.Брусиловскийдің «Қыз жібек» операсындағы Төлегеннің ролін алып шыға аласың ба? Небәрі бір айдай уақыт қалды. Үлгересің бе?» дейді. Сонда: «Ойланбастан алып шығамын» деп нық айтады. Аз уақыттың ішінде Төлегеннің партиясын жаттап,өз рөлін мүдірмей абыроймен алып шығады.
        Кейде өзге тілде опера айтуға тура келеді. Мұндайда тіл сындыру керек. Джорж Бизенің «Інжу іздеушілер» операсындағы Надирдің партиясын   орындаған. Бұл шығарманың қоюшы режиссерлері, көркемдік жетекшілері Итальядан келген мықты мамандар еді. Міне, сондай шетелдік мықтылардың іріктеуінен өтудің өзі неге тұрады? Қойылатын жаңа премьерада кімнің тез жаттау қабілеті болса, сол  әртістің партияны айтып шығу мүмкіндігі жоғары болатынын да айта кетейік. Сыннан мүдірмей өтіп,қазақ сахнасының примадоннасы ҚР Еңбек сіңірген әртісі  Майра Мұхамедқызымен бірге басты рөлдерді сомдап жоғары деңгейде  орындап, мерейі арта түседі. Бұл әншінің өнер жолында мол тәжірибе алмасуына үлкен септігі тиген сәт еді.
            Абай атындағы  қазақ мемлекеттік академиялық опера және балет театрында бес жылдай опера әртісі қызметін атқарып, Нұржамал Үсенбаева, Венера Алпысбаева,Нұржан Бажекенов,Талғат Күзембаев  сынды қазақ операсының майталмандарымен бір сахнада өнер көрсетіп, кәсіби шеберлігін шыңдайды. Айталық,ДЖ.Вердидің «Травиата» операсында Жозефтің партиясын, Е.Брусиловскийдің «Қыз жібек» операсында Төлегеннің ролін, Дж.Бизенің «Інжу іздеушілер» операсында Надирдің партиясын, П.Чайковскийдің «Иоланта» операсында Альмериктің ролін, Дж.Россинидің «Сивельдік шаштараз» операсында офицер рөлін сомдап, өзін жаңа бір қырынан таныта білді.
         Бүгінде Сыр елінің классикалық өнерін насихаттауда аянбай еңбек етіп келеді. 2016 жылдан бастап Қызылорда облыстық филармониясы жанындағы Тұрмағамбет атындағы халық аспаптар оркестрдің солисті қызметін абыроймен атқарып келеді. Өнер ұжымымен бірге Әзірбайжан, Өзбекстан, Түркия мемлекеттерінде гастрольдік сапарда болып, қазақ елінің өнерін паш етеді.
         Өнер жолымен қатар ұстаздықты қатар алып жүрген азамат. Қазіргі уақытта Қазанғап атындағы Қызылорда музыкалық жоғары колледжінің «Ән салу» бөлімінің ұстазы. Шәкірт тәрбиелеп, талапты жастарды өнерге баулуда тынбай еңбек етуде.
       Мақсат Нұрланұлының қай еңбегі болмасын елеусіз қалған емес. Мәселен, 2018 жылы ТURKSOY ұйымының «Алғыс хатымен», 2019 жылы Еліміздің мәдениет саласына сіңірген еңбегі үшін «Қазақ мәдениетінің қайраткері» құрметті атағымен, 2022жылы Қазақстан Республикасы вокалдық өнерінің дамуына қосқан зор үлесі мен еңбегі үшін Күләш Байсейітова атындағы медальмен марапатталады. Мұнан өзге де жетістіктері өте көп.
Өмірде осындай биік белестерді бағындырғаны ең әуелі ата-анасының дұрыс бағыт-бағдар беруінен болса керек-ті. Өйткені Мақсаттың өнерге келуіне қос бәйтерегінің ықпалы болғанын айта кеткен жөн. Әкесі Нұрлан Мақұлбеков – шаруа адамы. Анасы Карима Шоңғараева өнерден алыс емес. Демек ,ананың ақ сүтімен дарыған өнерді баласы жалғап келеді. Жары Ұлдана  Бейсенова екеуі асықтай үш ұлды дүниеге әкеліп, тәрбиелеуде. Отбасының төлбаласы Мейіржан футбол ойнап, суда жүзумен шұғылданғанды жақсы көреді.  Оқуда да үздік. Екінші ұлы Мирас Ordaschool мектебінін оқушысы. Ол да сабақтан тыс кезде дзюдоға қатысады және «Бегімай» өнер орталығында вокалдан білім алуда.. Үшінші ұлын Айдар деп қоюының себебі де жоқ емес. Л.Хамиди мен А.Жұбановтың маңдайалды туындысы «Абай» операсындағы Абайдың білімді, дарынды Айдар есімді оқушысының рөлін сомдау құрметіне ие болған Мақсат, ұлын да сондай азамат болып өссін деген ниетпен есімін қояды.  Мақсаттың жары Ұлдана Бейсенова – әнші, ұстаз. Кәсіби білімін шыңдап, үздіксіз ізденісте жүруді құп көретін ол оқумен қатар Қазанғап атындағы Қызылорда музыкалық жоғары колледжінде ұстаздық етуде. Өнерлі отбасының  ұйытқысына айналған Мақсат пен Ұлдана махаббат пен өнер алаңында қол ұстасып, жұп жазбай бірге келеді.